ហិរញ្ញប្បទាននេះគឺ ផ្តល់ជូនសម្រាប់អ្នកការពារសិទ្ធិមនុស្សជាស្ត្រី និងជនមិនស្ថិតក្នុងភេទណាមួយនៃភេទទាំងពីរកំណត់តាមបែបប្រពៃណី និងអង្គការក្នុងតំបន់អាស៊ី និងប៉ាស៊ីហ្វិក ដើម្បីឆ្លើយតបចំពោះសេចក្ដីត្រូវការជាបន្ទាន់ ឬក្នុងគ្រាអាសន្នរបស់ពួកគេ ពាក់ព័ន្ធជាមួយសុវត្ថិភាព ឬសុខុមាលភាព។ ហិរញ្ញប្បទាននេះមានចេតនាផ្តល់ជូនសម្រាប់មនុស្ស ឬអង្គការដែលកំពុងរងការគំរាមកំហែង ឬស្ថិតក្នុងករណីអាសន្ន វិបត្តិ ឬហានិភ័យបណ្ដាលមកពីការងាររបស់ខ្លួនក្នុងការការពារសិទ្ធិស្ត្រី និងសិទ្ធិមនុស្ស។ ហិរញ្ញប្បទាននេះក៏មានផ្តល់ជូនសម្រាប់សេចក្ដីត្រូវការក្នុងពេលបន្ទាន់សម្រាប់សុខុមាលភាព ដូចជា ការប្រឹក្សាយោបល់ផ្នែកចិត្តសង្គម ការព្យាបាលសម្រាប់ការប៉ះទង្គិចធ្ងន់ធ្ងរ ឬការជួយជ្រោមជ្រែងផ្នែកវេជ្ជសាស្ត្រជាដើម។
លក្ខខណ្ឌវិនិច្ឆ័យសម្រាប់ហិរញ្ញប្បទាន
- ស្ត្រី ឬដឹកនាំដោយស្ត្រី៖ អ្នកការពារសិទ្ធិមនុស្សជាស្ត្រី ឬជនមិនស្ថិតក្នុងភេទណាមួយនៃភេទទាំងពីរកំណត់តាមបែបប្រពៃណី ចាំបាច់ត្រូវតែជាអ្នកទទួលផលចម្បងអំពីហិរញ្ញប្បទាន ដោយជាការល្អគួរត្រូវបានបញ្ជូនតាមបណ្តាញអង្គការសិទ្ធិស្ត្រី។
- ផ្ដោតការយកចិត្តទុកដាក់លើសិទ្ធិមនុស្ស៖ អ្នកការពារសិទ្ធិ ឬអង្គការដែលលើកកម្ពស់ការឈានឡើងនៃសិទ្ធិរបស់ស្ត្រី និង/ឬអ្នកស្រឡាញ់ភេទដូចគ្នា ដោយប្រើប្រាស់យុទ្ធវិធី ឬយុទ្ធសាស្ត្រអហិង្សា និងលើកកម្ពស់ភាពជាសកលនៃសិទ្ធិមនុស្ស។
- មិនបានរំពឹងទុកជាមុន និង/ឬក្នុងពេលបន្ទាន់៖ ព្រឹត្តិការណ៍ ឬស្ថានភាពជាក់លាក់ដែលត្រូវឆ្លើយតប គឺជាស្ថានភាពអាសន្ន ឬវិបត្តិដែលអ្នកការពារសិទ្ធិ ឬស្ថាប័នរបស់ពួកគេកំពុងប្រឈមហានិភ័យ។
- គាំទ្រសម្រាប់សន្តិសុខ និងសុខុមាលភាព៖ ហិរញ្ញប្បទានដែលត្រូវបានស្នើសុំចាំបាច់ត្រូវតែចាត់ចែងទុកសម្រាប់វិធានការសន្តិសុខ (ឧ. ជំនួយផ្នែកច្បាប់ ការផ្លាស់ទីតាំង ឬការជន្លៀសចេញ ការវាយតម្លៃហានិភ័យ និងការបណ្ដុះបណ្ដាល ឧបករណ៍សន្ដិសុខ) និង/ឬសម្រាប់សេចក្ដីត្រូវការផ្នែកសុខុមាលភាព (ឧ. ការប្រឹក្សាយោបល់ផ្នែកចិត្តសាស្ត្រ ការព្យាបាលបញ្ហាការប៉ះទង្គិចធ្ងន់ធ្ងរផ្លូវចិត្ត ជំនួយផ្នែកវេជ្ជសាស្ត្រ) ជូនដល់អ្នកការពារ ឬស្ថាប័នរបស់ពួកគេ
- ក្នុងពេល ឬភ្លាមៗក្រោយពេលវិបត្តិ៖ ហិរញ្ញប្បទានដែលត្រូវបានស្នើសុំ ចាំបាច់ត្រូវមានចេតនា ដើម្បីគាំទ្រដល់សន្តិសុខ និងសុខុមាលភាពរបស់អ្នកការពារសិទ្ធិ ឬស្ថាប័នរបស់ពួកគេក្នុងពេលមានវិបត្តិ ឬភ្លាមៗក្រោយពេលមានវិបត្តិ។
- បានទទួលការគាំទ្រ ឬស្ថិតក្នុងបណ្តាញ៖ អ្នកការពារសិទ្ធិ ឬអង្គការរបស់ពួកគេ មានការគាំទ្រពីអ្នកដទៃទៀតដែលជាប់ពាក់ព័ន្ធ ក្នុងផ្នែកសិទ្ធិមនុស្សរបស់ស្ត្រី សិទ្ធិផ្លូវភេទ ឬវិស័យសិទ្ធិមនុស្សពាក់ព័ន្ធ នៅថ្នាក់មូលដ្ឋាន ឬថ្នាក់ជាតិ។
សូមអាន សំណួរដែលច្រើនលើកឡើង នៅទីនេះ។
ប្រសិនបើមានសំណួរ សូមឱ្យផ្ញើអ៊ីមែលមកកាន់យើងខ្ញុំ តាមអាសយដ្ឋាន៖ grants@uafanp.org
១. ការដាក់ពាក្យចាំបាច់ត្រូវឆ្លើយតបតាមលក្ខខណ្ឌវិនិច្ឆ័យទាំងអស់ខាងក្រោម។
២. ជនមិនស្ថិតក្នុងភេទណាមួយនៃភេទទាំងពីរកំណត់តាមបែបប្រពៃណី គឺជាសព្ទមានន័យក្ដោបរួមទូទៅ សំដៅលើបុគ្គលទាំងឡាយណាដែលអត្តសញ្ញាណយេនឌ័រ និង/ឬការបង្ហាញចេញផ្នែកយេនឌ័ររបស់ពួកគេ គឺមិនមែនជាបុរសទាំងស្រុង ឬជាស្ត្រីទាំងស្រុង មិនមានលក្ខណៈជាប្រុសដាច់ខាត ឬជាស្រីដាច់ខាត ជាហេតុធ្វើឱ្យពួកគេស្ថិតនៅក្រៅចំណាត់ប្រភេទយេនឌ័រក្នុងចង្កោមភេទទាំងពីរ ដែលបានកំណត់តាមបែបប្រពៃណី និងនិយាមដែលកំណត់ថាជាភេទធម្មតា។ UAF A&P ប្រើប្រាស់ពាក្យនេះ ដើម្បីក្ដោបទូទៅលើអ្នកមានអវយវៈភេទទាំងពីរនៅរួមគ្នាក្នុងបុគ្គលតែមួយ អ្នកមានពហុយេនឌ័រ អ្នកមានយេនឌ័រមិនអាចកំណត់បាន អ្នកមានយេនឌ័រប្រែប្រួល និងអ្នកឥតមានយេនឌ័រ។
ហិរញ្ញប្បទាន UAF A&P មិនគាំទ្រដល់៖
ជនមានភេទជាបុរសតាមការកំណត់ទូទៅ* ឬអង្គការ ឬបណ្ដាញដឹកនាំដោយបុរស
សំណើសុំជាលក្ខណៈបុគ្គលដោយមិនមានការគាំទ្រពីស្ថាប័នណាមួយ
សហគមន៍ដែលបានបង្កើតរឹងមាំហើយ ឬសម្ព័ន្ធភាពបណ្ដាញដែលបានបង្កើតរឹងមាំហើយ ឬទីប្រឹក្សា របស់ UAF A&P
សកម្មភាព ឬគម្រោងសម្រាប់វិបត្តិមនុស្សធម៌ ឬគ្រោះមហន្តរាយធម្មជាតិ
សកម្មភាព ឬគម្រោងផ្ដោតការយកចិត្តទុកដាក់លើជំនួយអភិវឌ្ឍន៍ ឬជំនួយសប្បុរសធម៌
គម្រោង ឬសកម្មភាពដែលជាផ្នែកមួយនៃកម្មវិធីប្រក្រតីរបស់ស្ថាប័នណាមួយ
ថវិកាប្រតិបត្តិការជាប្រក្រតី និង/ឬមូលនិធិបិទភ្ជិតគម្លាត (ឬដើម្បីបំពេញគម្លាតមូលនិធិ)។
* ជនមានភេទជាបុរសតាមការកំណត់ទូទៅ គឺជាបុគ្គលដែលកំណត់អត្តសញ្ញាណខ្លួនឯងថាជាបុរស ហើយត្រូវបានកំណត់ថាជាបុរសភេទតាំងពីកំណើត។