ហិរញ្ញប្បទានរបស់យើង
UAF A&P ផ្តល់មូលនិធិដល់សកម្មជនជាស្ត្រី និងជនមិនស្ថិតក្នុងភេទណាមួយនៃភេទទាំងពីរកំណត់តាមបែបប្រពៃណី[1] ព្រមទាំងគ្រួសារ និងស្ថាប័នរបស់ពួកគេនៅក្នុងពេលមានវិបត្តិ។ យើងផ្ដល់ហិរញ្ញប្បទានពីរប្រភេទ។ ហិរញ្ញប្បទានសន្តិសុខ និងសុខុមាលភាព គឺសម្រាប់អ្នកដែលត្រូវការមូលនិធិបន្ទាន់ ដើម្បីជួយធានាសុវត្ថិភាពពីគ្រោះថ្នាក់ផ្នែករាងកាយ ឬផ្លូវចិត្ត។ ហិរញ្ញប្បទានផ្ដល់ធនធានភាពធន់ គឺសម្រាប់អ្នកដែលចង់ត្រៀមខ្លួនឱ្យបានល្អទុកជាមុន សម្រាប់ការគំរាមដែលអាចកើតមាន និងអ្នកដែលត្រូវឆ្លើយតបចំពោះបញ្ហា ឬឱកាសល្អសំខាន់ណាមួយមួយក្នុងរយៈពេល ៣-៦ ខែខាងមុខ។ យើងសូមឱ្យអ្នកអត់ធ្មត់ នៅក្នុងអំឡុងដំណើរការពិនិត្យលើការដាក់ពាក្យមកកាន់ UAF A&P។ តាមធម្មតា អ្នកនឹងបានទទួលសារឆ្លើយតបបញ្ជាក់ថាបានទទួលការដាក់ពាក្យរបស់អ្នកក្នុងចន្លោះរយៈពេល ៤៨-៧២ ម៉ោង។ យើងលើកទឹកចិត្តឱ្យអ្នកឧស្សាហ៍ឆែកមើលប្រអប់សារ ProtonMail របស់អ្នក និង/ឬក្តារព័ត៌មានដាក់ពាក្យរបស់អ្នកនៅក្នុងគណនី UAF A&P ដើម្បីមើលព័ត៌មាន និងសារប្រាស្រ័យទាក់ទងបច្ចុប្បន្នភាព។ នៅពេលការដាក់ពាក្យត្រូវបានអនុម័ត ហើយឯកសារចាំបាច់នានា ត្រូវបានចុះហត្ថលេខារួចរាល់ អ្នកនឹងអាចទទួលបានហិរញ្ញប្បទានក្នុងចន្លោះ ១០-១៥ ថ្ងៃធ្វើការ។
ប្រភេទហិរញ្ញប្បទាន
ហិរញ្ញប្បទានសន្តិសុខ និងសុខុមាលភាព
ហិរញ្ញប្បទាននេះគឺផ្តល់ជូនសម្រាប់អ្នកការពារសិទ្ធិមនុស្សជាស្ត្រី និងជនមិនស្ថិតក្នុងភេទណាមួយនៃភេទទាំងពីរកំណត់តាមបែបប្រពៃណី[1] និងអង្គការក្នុងតំបន់អាស៊ីនិងប៉ាស៊ីហ្វិក ដែលមានសេចក្ដីត្រូវការបន្ទាន់ ឬស្ថិតក្នុងគ្រាអាសន្នពាក់ព័ន្ធជាមួយសុវត្ថិភាព ឬសុខុមាលភាពរបស់ខ្លួន។ ហិរញ្ញប្បទាននេះមានចេតនាផ្តល់ជូនសម្រាប់មនុស្ស ឬអង្គការដែលកំពុងរងការគំរាមកំហែង ឬស្ថិតក្នុងស្ថានភាពអាសន្ន វិបត្តិ ឬហានិភ័យបណ្ដាលមកពីការងាររបស់ខ្លួនក្នុងការការពារសិទ្ធិស្ត្រី និងសិទ្ធិមនុស្ស។ ហិរញ្ញប្បទាននេះក៏មានផ្តល់ជូនសម្រាប់សេចក្ដីត្រូវការក្នុងគ្រាបន្ទាន់សម្រាប់សុខុមាលភាព ដូចជា ការប្រឹក្សាយោបល់ផ្នែកចិត្តសង្គម ការព្យាបាលសម្រាប់ការប៉ះទង្គិចធ្ងន់ធ្ងរ ឬការជួយជ្រោមជ្រែងផ្នែកវេជ្ជសាស្ត្រ។
ហិរញ្ញប្បទានធនធានសម្រាប់ភាពធន់
ហិរញ្ញប្បទាននេះផ្តល់ជូនសម្រាប់អ្នកការពារសិទ្ធិមនុស្សជាស្ត្រី និងជនមិនស្ថិតក្នុងភេទណាមួយនៃភេទទាំងពីរកំណត់តាមបែបប្រពៃណី [1] និងអង្គការក្នុងតំបន់អាស៊ីនិងប៉ាស៊ីហ្វិក ដែលធ្វើការម្នាក់ឯង ឬ ធ្វើការសហការគ្នាជាមួយអ្នកដទៃទៀត ហើយព្យាយាមអនុវត្តការផ្ដួចផ្ដើមគំនិត ឬការឆ្លើយតបចំពោះឱកាសដែលពុំបានរំពឹងទុកជាមុនណាមួយ ដែលអាចចូលរួមចំណែកចំពោះភាពធន់របស់ពួកគេ នៅក្នុងការងារសកម្មជន និងចលនាសិទ្ធិមនុស្សរបស់ស្ត្រី និងសិទ្ធិមនុស្ស។
ហិរញ្ញប្បទានសំណាញ់សុវត្ថិភាព និងការថែទាំ
បុគ្គល ក្រុម ឬអង្គការទាំងឡាយណា ដែលចូលរួមយ៉ាងសកម្មនៅក្នុងកម្មវិធីការជួយជំរុញអ្នកការពាររបស់ UAF A&P ផ្ដោតការយកចិត្តទុកដាក់លើការពង្រឹងសំណាញ់សុវត្ថិភាព និងការថែទាំសម្រាប់អ្នកការពារសិទ្ធិ និងសកម្មជនជាស្ត្រី និងជនមិនស្ថិតក្នុងភេទណាមួយនៃភេទទាំងពីរកំណត់តាមបែបប្រពៃណី គឺមានលក្ខណៈសម្បត្តិអាចទទួលបានហិរញ្ញប្បទាននេះ។ ហិរញ្ញប្បទានសំណាញ់សុវត្ថិភាព និងការថែទាំ គឺផ្តល់ជូនឱ្យតែនៅពេលមានការអញ្ជើញឱ្យចូលរួមប៉ុណ្ណោះ។
Approval Process
យើងស្នើសុំឱ្យសកម្មជន ឬអ្នកការពារសិទ្ធិទាំងឡាយណា ដែលដាក់ពាក្យសុំហិរញ្ញប្បទានពី UAF A&P ត្រូវមានគណនីអ៊ីមែល ProtonMail ប្រភេទមិនបង់ប្រាក់ជាមុនសិន ដើម្បីធានាឱ្យអាចប្រាស្រ័យទាក់ទងបានដោយសន្តិសុខ។ បន្ទាប់ពីមានគណនី ProtonMail ហើយ គេអាចប្រើប្រាស់អាសយដ្ឋាននោះ មកចុះឈ្មោះនៅលើប្រព័ន្ធការផ្តល់ហិរញ្ញប្បទានឆ្លើយតបរហ័ស (RRG)។ នៅពេលបំពេញទម្រង់ដាក់ពាក្យ ត្រូវធានាយ៉ាងណាឱ្យមានការបញ្ជាក់ព័ត៌មានលម្អិតពាក់ព័ន្ធទាំងអស់យ៉ាងត្រឹមត្រូវ។ នៅពេលដាក់ពាក្យរួចហើយ អ្នកដាក់ពាក្យនឹងបានទទួលលេខដាក់ពាក្យ ហើយអ្នកសម្របសម្រួលហិរញ្ញប្បទានម្នាក់នឹងត្រូវបានចាត់តាំងឱ្យទៅគាត់។ អ្នកនឹងអាចទទួលសារបញ្ជាក់ថាយើងបានទទួលការដាក់ពាក្យរបស់អ្នក ក្នុងរយៈពេលចន្លោះ ៤៨-៧២ ម៉ោង។ ក្នុងដំណាក់កាលការត្រួតពិនិត្យតាមនីតិវិធីបម្រុងប្រយ័ត្ន ការដាក់ពាក្យនឹងត្រូវបានពិនិត្យដោយអ្នកសម្របសម្រួល និងទីប្រឹក្សាថ្នាក់តំបន់។ យើងខ្ញុំលើកទឹកចិត្តឱ្យអ្នកឧស្សាហ៍ឆែកមើលប្រអប់អ៊ីមែល ProtonMail របស់អ្នក និង/ឬក្ដារព័ត៌មានដាក់ពាក្យរបស់អ្នកនៅក្នុងគណនី UAF A&P ដើម្បីបានទទួលព័ត៌មាន និងការប្រាស្រ័យទាក់ទងបច្ចុប្បន្នភាពទាំងអស់។ នៅពេលការដាក់ពាក្យត្រូវបានអនុម័ត ហើយឯកសារចាំបាច់នានាត្រូវបានចុះហត្ថលេខារួចហើយ អ្នកអាចរំពឹងថាបានទទួលហិរញ្ញប្បទានរបស់ខ្លួនក្នុងរយៈពេល ៧-១០ ថ្ងៃធ្វើការ។ វដ្ដហិរញ្ញប្បទាន ត្រូវបិទ នៅពេលអ្នកទទួលហិរញ្ញប្បទានបានដាក់របាយការណ៍ស្ថាពរស្ដីអំពីថាតើគាត់បានយកមូលនិធិនោះទៅប្រើប្រាស់យ៉ាងណាខ្លះ។
ចំណុចផ្សេងទៀតដែលអ្នកគួរដឹងស្តីពីហិរញ្ញប្បទានរបស់យើង៖
ហិរញ្ញប្បទានអាចមានទឹកប្រាក់រហូតដល់ ៥០០០ ដុល្លារអាមេរិក។ ការដាក់ពាក្យធ្វើឡើងដោយអ្នកការពារសិទ្ធិ ឬអង្គការដែលធ្លាប់បានទទួលហិរញ្ញប្បទានពីមុនមកហើយ នឹងត្រូវយកមកពិចារណាតាមករណីជាក់ស្តែងនីមួយៗ។
ការដាក់ពាក្យទាំងអស់ ចាំបាច់ត្រូវមានលក្ខណៈសម្បត្តិឆ្លើយតបទៅតាមប្រភេទហិរញ្ញប្បទានណាមួយ ក្នុងចំណោមប្រភេទហិរញ្ញប្បទានទាំងនេះ។ អ្នកអាចធ្វើតេស្តវាយតម្លៃលក្ខណៈសម្បត្តិសម្រាប់ទទួលបានហិរញ្ញប្បទានរបស់យើង។
សូមរក្សាភាពអត់ធ្មត់ ក្នុងអំឡុងពេលដែល UAF A&P កំពុងពិនិត្យការដាក់ពាក្យសុំ។ អ្នកនឹងអាចទទួលសារបញ្ជាក់ថាយើងបានទទួលការដាក់ពាក្យរបស់អ្នក ក្នុងរយៈពេលចន្លោះ ៤៨-៧២ ម៉ោង។ យើងខ្ញុំលើកទឹកចិត្តឱ្យអ្នកឧស្សាហ៍ឆែកមើលប្រអប់អ៊ីមែល ProtonMail របស់អ្នក និង/ឬក្ដារព័ត៌មានដាក់ពាក្យរបស់អ្នកនៅក្នុងគណនី UAF A&P ដើម្បីបានទទួលព័ត៌មាន និងការប្រាស្រ័យទាក់ទងបច្ចុប្បន្នភាពទាំងអស់។ នៅពេលការដាក់ពាក្យត្រូវបានអនុម័ត ហើយឯកសារចាំបាច់នានាត្រូវបានចុះហត្ថលេខារួចហើយ អ្នកអាចរំពឹងថាបានទទួលហិរញ្ញប្បទានរបស់ខ្លួនក្នុងរយៈពេល ១០-១៥ ថ្ងៃធ្វើការ។
ការផ្តល់ហិរញ្ញប្បទានរបស់យើង គឺផ្អែកលើព័ត៌មានបានទទួលពីបញ្ជីរង់ចាំផ្តល់ដោយទីប្រឹក្សាប្រចាំតំបន់ និងទីប្រឹក្សាប្រចាំប្រទេសដែលយើងពឹងពាក់ នៅពេលធ្វើការវាយតម្លៃលើការដាក់ពាក្យ។
ឯកជនភាពរបស់អ្នកគឺសំខាន់ខ្លាំងណាស់ ហើយយើងចាត់វិធានការដើម្បីធានាសុវត្ថិភាពរបស់អ្នក។ ការដាក់ពាក្យត្រូវបានចែករំលែកតែជាមួយទីប្រឹក្សា UAF A&P ឬបុគ្គលទំនាក់ទំនងគួរជាទីទុកចិត្ត (តាមការចាំបាច់) ប៉ុណ្ណោះ។
នៅពេលហិរញ្ញប្បទានត្រូវបានអនុម័ត មូលនិធិនឹងត្រូវបានផ្តល់ជូនក្នុងចន្លោះ ១០-១៥ ថ្ងៃ។ អ្នកទទួលហិរញ្ញប្បទានទាំងអស់ ចាំបាច់ត្រូវដាក់របាយការណ៍ស្ថាពរ ដោយពិពណ៌នាអំពីរបៀបដែលខ្លួនបានយកហិរញ្ញប្បទានទៅចំណាយ។
- សូមប្រើប្រាស់បណ្ដាញប្រាស្រ័យទាក់ទងមានសន្តិសុខ (encrypted channels) ក្នុងការប្រាស្រ័យទាក់ទងជាមួយយើងខ្ញុំ៖ សូមប្រើអ៊ីមែល ProtonMail និងកម្មវិធី Signal សម្រាប់ការផ្ញើសារ។ ចំពោះសំណួរទាក់ទងជាមួយការដាក់ពាក្យសុំហិរញ្ញប្បទាន សូមទំនាក់ទំនងមកកាន់យើងខ្ញុំតាមអ៊ីមែល៖ grants@uafanp.org។ ចំពោះបញ្ហាផ្នែកបច្ចេកទេសទាក់ទងជាមួយការប្រើប្រាស់កម្មវិធីដាក់ពាក្យសុំតាមអនឡាញ សូមទំនាក់ទំនងទៅកាន់៖ esther@uafanp.org ។
សម្រាប់សំណួរបន្ថែម សូមមើល “សំណួរដែលច្រើនសួរញឹកញាប់” របស់យើង។
*ជនមិនស្ថិតក្នុងភេទណាមួយនៃភេទទាំងពីរកំណត់តាមបែបប្រពៃណី គឺជាសព្ទមានន័យក្ដោបរួមទូទៅ សំដៅលើបុគ្គលទាំងឡាយណាដែលអត្តសញ្ញាណយេនឌ័រ និង/ឬការបង្ហាញចេញផ្នែកយេនឌ័ររបស់ពួកគេ គឺមិនមែនជាបុរសទាំងស្រុង ឬជាស្ត្រីទាំងស្រុង មិនមានលក្ខណៈជាប្រុស ឬជាស្រីដាច់ខាត ជាហេតុធ្វើឱ្យពួកគេស្ថិតនៅក្រៅចំណាត់ប្រភេទយេនឌ័រក្នុងចង្កោមភេទទាំងពីរ ដែលបានកំណត់តាមបែបប្រពៃណី និងនិយាមដែលកំណត់ថាជាភេទធម្មតា។ UAF A&P ប្រើប្រាស់ពាក្យនេះ ដើម្បីក្ដោបទូទៅលើអ្នកមានអវយវៈភេទទាំងពីរនៅរួមគ្នាក្នុងបុគ្គលតែមួយ អ្នកមានពហុយេនឌ័រ អ្នកមានយេនឌ័រមិនអាចកំណត់បាន អ្នកមានយេនឌ័រប្រែប្រួល និងអ្នកឥតមានយេនឌ័រ។
ហិរញ្ញប្បទាន UAF A&P មិនគាំទ្រដល់៖
ជនមានភេទជាបុរសតាមការកំណត់ទូទៅ* ឬអង្គការ ឬបណ្ដាញដឹកនាំដោយបុរស
សំណើសុំជាលក្ខណៈបុគ្គលដោយមិនមានការគាំទ្រពីស្ថាប័នណាមួយ
សហគមន៍ដែលបានបង្កើតរឹងមាំហើយ ឬសម្ព័ន្ធភាពបណ្ដាញដែលបានបង្កើតរឹងមាំហើយ ឬទីប្រឹក្សា របស់ UAF A&P
សកម្មភាព ឬគម្រោងសម្រាប់វិបត្តិមនុស្សធម៌ ឬគ្រោះមហន្តរាយធម្មជាតិ
សកម្មភាព ឬគម្រោងផ្ដោតការយកចិត្តទុកដាក់លើជំនួយអភិវឌ្ឍន៍ ឬជំនួយសប្បុរសធម៌
គម្រោង ឬសកម្មភាពដែលជាផ្នែកមួយនៃកម្មវិធីប្រក្រតីរបស់ស្ថាប័នណាមួយ
ថវិកាប្រតិបត្តិការជាប្រក្រតី និង/ឬមូលនិធិបិទភ្ជិតគម្លាត (ឬដើម្បីបំពេញគម្លាតមូលនិធិ)។
* ជនមានភេទជាបុរសតាមការកំណត់ទូទៅ គឺជាបុគ្គលដែលកំណត់អត្តសញ្ញាណខ្លួនឯងថាជាបុរស ហើយត្រូវបានកំណត់ថាជាបុរសភេទតាំងពីកំណើត។